La Zonte Illy nus taie la lenghe!

Come che forsit za o savês cualchi dì indaûr la Zonte Illy e à fat bon il dissen di leç che e varès di tutelâ la lenghe furlane integrant la L.R. 15/96 (Normis pe tutele e la promozion de lenghe e de culture furlane), tignint cont ancje de jentrade in vore de Leç 482/99 (normis in cont di tutele des minorancis linguistichis storichis). La Regjon e veve nomenât une Comission di esperts pe scriture di chest dissen di leç, ma il test fat bon de Zonte Illy al è stât savoltât rispiet al origjinâl, cussì tant di risultâ un pas indaûr rispiet ae normative statâl e regjonâl in vore in dì di vuê. Lassant pierdi la cuestion metodologjiche (prime si nomene une comission e dopo si bute par aiar lis sôs conclusions), lis modifichis fatis a àn produsût un test incoerent e in cierts articui, adiriture anticostituzionâl. Noaltris operadôrs linguistics o vin il "dovê" di informâ la int di ce che che al è daûr a sucedi, su cheste situazion che e met in pericul lis concuistis dai ultins 10 agns di politiche linguistiche. L'obietîf al è chel di rindi publiche la nestre proteste: i timps a son strets ma alc di pues inmò fâ. Cumò la discussion dal dissen di leç e passarà in Consei Regjonâl, e o volìn fâ capî a cui che al varà di decidi, ma ancje ae popolazion, che la uniche decision pussibile e je chê di aprovâ il test origjinâl, così come che al è stât formulât de Comission di esperts. Ca sot o cjatais il document che al è stât publicât dai gjornâi. Il test al è stât firmât no dome di operadôrs linguistics furlans, parcè che il probleme al è regjonâl, nol rivuarde dome la lenghe furlane ma dute la politiche linguistiche dal Friûl-Vignesie Julie, e dut il sisteme des minorancis linguistichis regjonâls.

UNE PROPUESTE INDECENTE

Ta chestis setemanis la Zonte Illy e à fate buine une propueste di leç regjonâl che e varès di conventâ a tutelâ la lenghe furlane, rinfuarcint e integrant la Leç 15 fate buine de Regjon F.V.J. tal 1996.

O doprìn il condizionâl parcè che, par come che le viodìn nô, no je vere che si trate di une leç che e permetarà di miorâ la situazion de nestre marilenghe.

Noaltris operadôrs linguistics, che o lavorìn tai ents locâi e teritoriâi, e che ogni dì o vin a ce fâ cu la situazion dificile che la lenghe furlane e je daûr a vivi, o crodìn che la lenghe furlane e vedi bisugne di intervents seris e no di sflocjis!

Une propueste di cualitât e jere stade preparade di un grup di esperts che a vevin lavorât par mês, metint dongje un test che al leve te direzion juste: afermazion dal dirit di podê doprâ il furlan in ogni situazion; la presince di un orghin tecnic responsabil de politiche linguistiche regjonâl (ARLeF) che al varès vût di lavorâ cun serietât e continuitât; une scuele metude finalmentri tes condizions di podê dâ une istruzion plurilengâl ai nestris students, come che za e previôt la Leç statâl 482/99... E la liste des riformis positivis e varès podût lâ indevant inmò.

Invezit NO! Parcè che la Zonte Illy e à fat capî che chestis robis lis judiche “masse” pe nestre lenghe, e e à decidût di butâ par aiar il lavôr di mês e mês di int che e lavore di agns a pro de lenghe furlane, e di intervignî in maniere pesante sul test!

Noaltris operadôrs dai sportei linguistics o vin confrontât i doi tescj e si sin rindûts cont che, se ta chescj agns a jerin stâts fats tancj pas indevant, cun cheste gnove propueste di leç il Friûl al fasarès un salt indaûr di passe 10 agns: e je stade fintremai taiade la definizion dal ûs de lenghe furlane come di un dirit!

Il nestri interès nol è politic, ma al è chel di tecnics che a lavorin intal setôr de promozion linguistiche, cussients des problematichis che a son tal meti in vore lis normis di tutele, ma convints che si à di lâ indevant e no indaûr.

Ce che al à stât fat bon de Zonte regjonâl nol va ta chê direzion. Si trate di un pas indaûr rispiet ae leç statâl di tutele des minorancis linguistichis e ancje rispiet ae politiche europeane ta chest setôr.

Al è ancjemò timp par comedâ i erôrs fats e par chest e je bisugne che il Consei regjonâl al torni sul test de propueste fate indenant dai esperts. Al è impuartant l'impegn di ducj par lâ ta cheste direzion e par convinci i conseîrs regjonâi a cjapâ cheste strade.

Se cussì nol ves di jessi, al è ben che ancje lôr si visin che ca di cualchi mês si varà di lâ a votâ, e i furlans a varan di meti sul plat de belance ancje l'impegn che lis fuarcis politichis, sedi a centriçampe sedi a centridrete, a àn metût par difindi la lenghe furlane e dut il patrimoni plurilengâl, unic vêr element che al justifiche e che al fonde la specialitât de nestre regjon.

Forsit lis elezions no si vincin dome cu la tutele linguistiche, ma i nestris politics a àn di rindisi cont che, cence i furlans e il furlan, al è facil pierdilis.

I sporteliscj di lenghe furlane e todescje

Alessandro Carrozzo, Christian Romanini, Elena Zanussi, Federica Angeli, Federica Mecchia, Isa Dorigo, Laura G. Lazzara, Lorena Zuccolo, Maria Grazia Lacovig, Maurizio Biasizzo, Priscilla De Agostini, Rosalba Della Pietra, Rossella Malisan, Sara Cuomo, Sara Maieron